Nəcməddin Mürvətovun iki kitabının təqdimatı keçirilib

2017-ci il oktyabrın 10-da Azərbaycan Yazıçılar Birliyinin (AYB) “Natəvan” klubunda “Bayatı” kitab mağazası, “Cabir Novruz” Mədəniyyət Fondunun təşkilatçılığı ilə “Cabir Novruz” Mədəniyyət Fondunun vitse-prezidenti, Azərbaycan Yazıçılar Birliyinin üzvü, şair, “Tərəqqi” medallı, Əməkdar müəllim Nəcməddin Mürvətovun yenicə çapdan çıxmış (şeirlər, gəzəllər, düşüncələr) “Dünyamızın zərrəsiyəm” və “Şairdə sirr olmur…” adlı şeirlər kitablarının imza günü keçirildi.
Tədbiri giriş sözü ilə “Cabir Novruz” Mədəniyyət Fondunun təsisçisi Müşfiq Cabiroğlu açaraq, qonaqları salamladı, Fondun prezidenti, professor Cavanşir Qurbanovun şair Nəcməddin Mürvətova ünvanlanmış təbrikini və xoş arzularını çatdırdı.
Tədbir Əməkdar artist Hüsniyyə Mürvətovanın ifasında Xalq şairi Cabir Novruzun “Sağlığında qiymət verin insanlara” şeirinin səslənməsi ilə davam etdi.
Sonra M. Cabiroğlu sözü tədbirin aparıcısı “Kredo” qəzetinin baş redaktoru, Beynəlxalq Rəsul Rza mükafatı laureatı, şair Əli Rza Xələfliyə verdi. O, şairin yaradıcılığı və yeni nəşr olunan kitabları haqqında çıxış etdi.
İmza günündə Siyəzən rayon icra hakimiyyəti başçısının müavini Zəfər Əliyev şairin insani keyfiyyətlərindən, regiondakı nüfuzundan, bənzərsiz insanlığından söz açdı.
Daha sonra sairlər Ofelya Babayeva, Zahid Xəlil, Musa Ələkbərli, Cığatel, Fərqanə Mehdiyeva, Nəfisət Vahid, tanınmış alimlərdən AMEA-nın əməkdaşları Vaqif Yusifli, Qurban Bayramov, Rasim Nəbioğlu, BDU-nun professoru Eldar Məsimov, AYB Şabran rayon bölməsinin sədri Aydın Tağıyev şeirləri ardıcıl olaraq respublikanın ədəbi qəzet və jurnallarında, almanaxlarda çap olunan şairi növbəti kitablarının işıq üzü görməsi münasibətilə təbrik edib, ona yaradıcılıq uğurları arzuladılar.
Tədbirdə həmçinin əməkdar artist, Elza Seyidcahan çıxış edərək şairi təbrik etdi, Cabir Novruzun sözlərinə bəstələdiyi “Sizə, güvəndiyim dağlar” mahnısını oxudu.
Tədbirdə bədii qiraətçi Mətanət Əsədullayeva və şairin nəvələri Fəxriyyə, Nigar Mürvətzadələr babalarının şeirlərini oxudular.
Tədbirin sonunda müəllif – Siyəzəndə yaşayıb-yaradan Nəcməddin Mürvətov respublikamızda söz-sənət adamlarına göstərdiyi diqqət və qayğıya görə ölkə başçısı İlham Əliyevə minnətdarlığını bildirdi. Bölgələrdə yaşayan şairlərin yaradıcılığına yüksək dəyər verildiyini, onlara qayğı ilə yanaşıldığını söyləyib, tədbirin təşkilatçılarına, eləcə də bütün iştirakçılara minnətdarlığını bildirib, yeni şeirlərini oxuyub, imzası ilə kitablarını oxuculara təqdim etdi.