2 dekabr 2018-ci il tarixində Naxçıvan şəhərində Naxçıvan MR Mədəniyyət Nazirliyinin, “Cabir Novruz” Mədəniyyət fondunun və müşfiqsevər ziyalılarının birgə təşkilatçılığı ilə Azərbaycanın ölməz şairi Mikayıl Müşfiqin 110 illik yubileyinə həsr edilmiş möhtəşəm tədbir keçirilib. Görkəmli şair və dramaturg Hüseyn Cavidin məqbərəsi önündə təşkil olan tədbir Azərbaycan Respublikası Prezidenti İlham Əliyevin mayın 17-də görkəmli Azərbaycan şairi Mikayıl Müşfiqin anadan olmasının 110 illiyinin keçirilməsi haqqında imzalanmış Sərəncamına əsasən keçirilib.

İştirakçılar Ulu Öndər Heydər Əliyevin muzeyini ziyarət etmiş abidə önünə gül qoyublar.

Qonaqları Naxçıvan MR mədəniyyət nazirin müavini Rəşad Xudiyev salamlayaraq sözü tədbirin aparıcısı əməkdar jurnalist, pedaqogika üzrə fəlsəfə doktoru Qafar Əsgərzadəyə verib.

Tədbirdə həmçinin C.Cabbarlı Mədəniyyət Fondunun rəhbəri Cavanşir Qurbanov, Naxçıvan MR Yazıçılar Birliyinin sədri Asim Əliyev, Yazıçılar Birliyinin üzvü, müşfiqsevər Nəcməddin Mürvətov, M.Müşfiq və C.Cabbarlı mükafatı laureatı, müşfiqsevər Sənan Talıbov, Azərbaycan Respublikasının Əməkdar elm xadimi, professor Hüseyn Həşimli, AMEA Naxçıvan bölməsinin əməkdaşı, filologiya üzrə fəlsədə doktoru Ramiz Qasımlı və digərləri Mikayıl Müşfiqin həyat və yaradıcılığı haqqında geniş çıxış ediblər.

Məqbərə qarşısında Hüseyn Cavid rolunda Naxçıvan teatrının əməkdaşı xalq artisti Həsən Ağasoy, Mikayıl Müşfiq rolunda Tağı Müsfiq və xalq artisti Nurəddin Mehdixanlının içtirakı ilə tamaşa təqdim olunub. AzTV-nin əməkdaşı əməkdar artist Rəşad İlyasov sözləri Mikayıl Müşfiqə aid olan musiqilərlə yubileyə rəng qatıb.

Sonda C.Cabbarlı Mədəniyyət Fondunun rəhbəri Cavanşir Qurbanov və Mikayıl Müşfiqin yaxın qohumu şair Vahab İsmayılzadə tədbirin iştirakçılarına və Naxçıvan MR rəhbərliyinə göstərdikləri dəstəyə və qonaqpərvərliyə görə öz təşəkkürlərini bildiriblər.